काठमाडौँ / शुक्रबार सुनको मूल्यमा उच्च बृद्धि भएको छ । नेपाल सुनचाँदी व्यवसायी महासङ्घका अनुसार आज सुनको भाउ बढेर प्रतितोला १ हजार ३ सय रुपैयाँले बढेको हो ।
नेपाली नारीहरूको पर्व हरितालिका तीजकै दिन सुनको भाउ बढेर प्रतितोला १ लाख ५३ हजार ३ सय रुपैयाँ पुगेको छ ।
भदौ यता, नेपाली बजारमा सुनको कारोबार बृद्धि हुने सिजन भए पनि लगातारको मूल्यबृद्धिले बजार अझै सुनसान जस्तै रहेको व्यवसायीहरू बताउँछन् ।
महासङ्घका अनुसार, बिहीबार सुनको मूल्य तोलामा १ लाख ५२ हजार रुपैयाँमा कारोबार भएको थियो ।
यसअघि भदौ १३ गते सुनको मूल्य सर्वाधिक कायम भएको थियो । उक्त दिन सुन तोलाको १ लाख ५३ हजार २०० रुपैयाँमा कारोबार भएको थियो । त्यसयता भने सुनको मूल्य सामान्य घटबढ हुँदै कारोबार भइरहेको थियो ।
आज चाँदीको मूल्य भने तोलामा ३० रुपैयाँ बढेको छ । विहीबार तोलामा १ हजार ७६५ रुपैयाँमा कारोबार भएको चाँदीको भाउ बढेर आज भने १ हजार ७९५ रुपैयाँ कायम भएको हो ।
