काठमाडौँ / अष्ट्रेलियन एजुकेशन फेयर २०२५ को समापन भएको छ । अध्ययनका लागि अष्ट्रेलिया जाने विद्यार्थीहरूलाई लक्षित गर्दै काठमाडौँको नयाँ बानेश्वरमा रहेको गोरेटो एजुकेशन कन्सल्टेन्सीले अगस्ट १२ देखि सुरु गरेको एजुकेशन फेयरको समापन शनिबार भएको हो । 

फेयरमा अष्ट्रेलियाका विभिन्न कलेजहरूका प्रतिनिधीहरूकै उपस्थितिमा कुन सहर वा कुन विश्वविद्यालयमा जाँदा विद्यार्थीलाई उपयुक्त हुन्छ भन्ने विषयमा जानकारी दिनुका साथै अप्ठ्यारा परिस्थितीहरूको सामना कसरी गर्ने भन्ने विषयको जानकारी दिनका लागि फेयरको आयोजना गरिएको थियो । 

समापन कार्यक्रममा बोल्दै गोरेटो कन्सल्टेन्सीका प्रबन्धक गोविन्द भण्डारीले पछिल्लो समय नेपाली विद्यार्थीहरूमा अष्ट्रेलियाप्रति आकर्षण बढेकाले एजुकेशन फेयर गरेको बताए । उनले फेयरमा तीनसय भन्दा बढी विद्यार्थीले भिजिट गरेको समेत जानकारी दिए ।  

“पछिल्लो समय विद्यार्थीहरू अष्ट्रेलियाप्रति बढी आकर्षित छन् । त्यो बढ्दोक्रममा छ । त्यसैलाई लक्षित गर्दै फेयर गरिएको हो । पाँच दिनको फेयर आज शनिबार समापन हुँदैछ । फेयरमा तीन सय भन्दा बढी विद्यार्थीले भिजिट गरेका थिए”, उनले भने ।

त्यस्तै विद्यार्थीले अहिले अस्ट्रेलिया छान्नुको गर्नुको कारण त्यहाँको हावापानी, उच्च स्तरको पढाइ साथै सिड्नी सहरलाई नेपालको आठौँ प्रदेश मान्ने गरिएकाले सहज हुने विश्वासका साथ अष्ट्रेलिया नेपालीको रोजाइमा परेको उनले बताए । 

“अष्ट्रेलिया छान्नुको गर्नुको कारण भनेको त्यहाँको मौसम पनि हो । त्यहाँ चाहि न धेरै चिसो हुने न धेरै गर्मी हुने त्यो भयो । अर्को भनेको उच्च स्तरिय लेभलको पढाई भयो । नेपालीहरूलाई जहाँ धेरै नेपालीहरू छन् त्यहाँ गएर बस्दा चाँहि सहज हुने भएकाले र सिड्नी सहरलाई नेपालको आठौँ प्रदेश पनि भनिन्छ । त्यसैले अहिले रोजाइमा परेको छ” उनले भने । 

त्यस्तै, उनले अष्ट्रेलियामा नेपाली विद्यार्थीले आइटी क्षेत्रमा बढी चासो देखाएको बताए  । उनले नेपालबाट अष्ट्रेलिया पढ्न जाने विद्यार्थीलाई एक बर्षको पढाई खर्च २२ लाखसम्म लाग्ने बताए । 

अष्ट्रेलिया सरकारले विद्यार्थीलाई सिमित समय तोकेको हुँदा सीमित समय मात्र काम गर्न पाइन उनले बताए । नेपालबाट अष्ट्रेलिया पढ्न जाने विद्यार्थीहरूले  धेरैजसो सिड्नी सहर रोज्ने गरेको उनको भनाइ छ । 

“त्यहाँको सरकारले विद्यार्थीहरूका लागि काम गर्ने समय तोकिदिएको छ । फुल टाइम भने काम गर्न पाइँदैन । अध्ययनका कोर्षहरू भने विद्यार्थीको रोजाइमा आइटी क्षेत्र नै हो । पछिल्लो समयमा एआई सम्बन्धी कोर्षहरू एड्भान्स भएको देखिएको छ । नेपालमा पनि एआईको तिब्र रूपमा विकास भइरहेको छ । पढाईको खर्चको कुरा गर्दा एक बर्षको पढाई खर्च न्यूनतम १५ देखि २०–२२ लाख नेपाली रुपैयाँसम्म हुने गरेको छ । त्यसमध्ये पनि मेलवर्न, सिड्नी नेपालीको रोजाइमा छ,” उनले भने । 

नेपालीहरूका लागि गोरेटो कन्सल्टेन्सीले सबै हिसाबबाट सहजीकरण गरिरहेको उनले बताए । त्यस्तै, उनले त्यहाँको सरकारले तोकेको समय अनुुसार काम सकेर विद्यार्थीले जुन विषय लिएर  पढेका छन् त्यसमै दक्षता हासिल गर्न सक्यो भने नेपालमा  आएर काम गर्न सहज हुने बताएका छन् । 

“हुन त विदेशमा पढेर स्वदेशमै आएर काम गर्न सकिने प्रशस्त आधारहरू छन् । पढाइमै फोकस गरेर पढ्ने अनि दक्षता हासिल गरियो भने पक्कै पनि नेपाल आएर केही गर्न सकिन्छ । धेरैले नेपालमा आएर आइटी क्षेत्रमा नै केही नयाँ गरेको देखिन्छ,” उनले भने । 

त्यस्तै, उनले अहिले नेपाल सरकारले विद्यार्थीहरू विदेश गएर नफसोस् भन्ने हिसाबले कडाई गर्नुका साथै एनओसी ल्याएको समेत दाबी गरे । 

“हामीले सिक्नुपर्ने कुरा धेरै छन् । सरकारले पनि अलिकति कडाई गर्नुको कारण विद्यार्थीहरू नफसुन भनेर हो । पहिला पहिला कस्तो कलेजमा आवेदन दिइरहेको छु भन्ने थाहा नभएर धेरै फस्ने गरेका थिए तर अहिले धेरै सचेतना आइसकेको छ । अहिले एनओसी आएको छ । त्यसले धेरै भेरिफाइ गर्छ र सहजीकरण गर्छ,” उनले भने । 

फेयरमा अष्ट्रेलियामा रहेका विश्वविद्यालयहरूको भौतिक संरचनादेखि दक्ष र अनुभवी काउन्सिलरहरूबाट पनि कोर्स सेलेक्सन, अध्ययनमा जाँदा लाग्ने लागतदेखि आइएलट्स, टोफेलका बारेमा पनि जानकारी दिइएको छ ।