काठमाडौं/ राजधानीमा भएको एक साक्षत्कार कार्यक्रममा परराष्ट्रविद् निश्चलनाथ पाण्डेले प्रधानमन्त्री केपी ओलीको आसन्न भारत भ्रमण स्थलमार्गबाट गर्न सुझाव दिएका छन् ।
भारतीय प्रधानमन्त्री नरेन्द्र मोदीको १० वर्षे नेतृत्वमा भारतले गरेको प्रगति आफ्नै आँखाले हेर्न भनेका छन् ।
अहिले भारतको काश्मिरमा पर्यटन क्षेत्रको अभिवृद्धि भएको, विभिन्न देशका पर्यटकहरु त्यहाँ जान थालेको र बाह्य लगानी पनि बढेको छ, उनले भने, भारतीय प्रधानमन्त्री मोदीको १० वर्षे नेतृत्वमा त्यहाँ भएका विकासको अवलोकन गर्नुस् ।
उनले भने, ‘म आग्रह गर्दछु सम्माननीय प्रधानमन्त्रीज्यूसित, नेपाल सरकारसित यो भ्रमण स्थलमार्गबाट होस् । हवाई मार्गबाट होइन । चाहे भैरहवाबाट होस्, चाहे रक्सौलबाट होस् तर, स्थलमार्गबाट होस् ।
उहाँले पनि देख्नुहुनेछ, उत्तर प्रदेश, विहारको तीब्र विकास ।
सडक सञ्जालबाट, रेल सञ्जालबाट विगत १० वर्षमा विकास भएको छ । मोदी सरकार आएपछि १० वर्षमा जुन विकास भएको छ उत्तर भारतमा । त्यो लोभ लाग्दो विकास भएको छ,’– उनले भने ।
साथै, अहिले नेपालमा राजनीति, अर्थतन्त्र, सामाजिक क्षेत्रलगायतमा नयाँ पिँढी आइरहेको उनले बताए । त्यो नयाँ पिँढीलाई नेपाल–भारत सम्बन्धसित नजिक बनाउनुपर्ने उनले बताए ।
