काठमाडौँ / बुङ्गल हाइड्रो लिमिटेडले सर्वसाधारणका लागि आइपिओ भदौ १६ गतेदेखि खुला गर्ने भएको छ। कम्पनीले आयोजना प्रभावित क्षेत्रका स्थानीय र वैदेशिक रोजगारीमा रहेका नेपालीका लागि आइपिओ बाँडफाँट गरिसकेपछि अब दोस्रो चरणमा सर्वसाधारण लगानीकर्तालाई सेयर निष्काशन गर्न लागेको हो।
कम्पनीले १७ करोड १ लाख ५० हजार रुपैयाँ बराबरका १७ लाख १ हजार ५०० कित्ता साधारण सेयर प्रतिकित्ता १०० रुपैयाँ अंकित मूल्यमा निष्काशन गर्नेछ। लगानीकर्ताले न्यूनतम १० कित्तादेखि अधिकतम २० हजार कित्तासम्म आवेदन दिन सक्नेछन्। निष्काशन अवधि छिटोमा भदौ १९ र ढिलोमा भदौ ३० सम्म रहनेछ।
केयर रेटिङ नेपालले कम्पनीलाई केयरएनपी सिंगल बी इस्यूअर रेटिङ्ग प्रदान गरिएको छ । जसले औसत जोखिम सङ्केत गर्दछ। कम्पनीको १०।७० मेगावाट क्षमताको माथिल्लो सानिगाड जलविद्युत आयोजनाको लागत ३ अर्ब २ करोड रुपैयाँभन्दा बढी छ र विद्युत अनुमतिपत्र २६ वर्ष १० महिना बाँकी छ।
आइपिओको निष्काशन तथा बिक्री प्रबन्धक हिमालयन क्यापिटल लिमिटेड रहेको छ। आवेदन सी–आस्बा सदस्य बैंक तथा वित्तीय संस्था, तिनका शाखा कार्यालय र मेरो सेयर अनलाइनमार्फत गर्न सकिनेछ।
