बङ्गलादेशी भ्रष्टाचार विरोधी अधिकारीहरूले बुधबार अदालतमा पूर्व बेलायती मन्त्री तुलिप सिद्दिक विरुद्ध गवाही दिएका छन्। 

सिद्दिकमाथि पदच्यूत प्रधानमन्त्री शेख हसिनासँगको पारिवारिक सम्बन्धको दुरुपयोग गरेर बङ्गलादेशमा सरकारी जग्गा प्राप्त गरेको आरोप लगाइएको छ।

हसिनाकी भतिजी सिद्दिकले जनवरीमा प्रधानमन्त्री किर स्टार्मरको सरकारमा भ्रष्टाचार विरोधी मन्त्रीको पदबाट राजीनामा दिएका थिए । 

उनले लन्डनमा आफ्नी काकीसँग जोडिएका सम्पत्तिहरूमा बसेको र बङ्गलादेशमा भ्रष्टाचार विरोधी अनुसन्धानमा उनको नाम समावेश भएको रिपोर्टहरू आएपछि राजीनामा दिएका थिए । 

उनीमाथि उनकी आमा शेख रेहाना, भाइ रादवान मुजिब र बहिनी अजमिनासँग मिलेर मुद्दा चलाइएको छ । 

सिद्दिकमाथि राजधानी ढाकाको नजिकैको टाउनसिप परियोजनामा सरकारी जग्गा प्राप्त गर्न सहजीकरण गरेको आरोप छ । 

चारैजनालाई पहिले अभियोग लगाइएको थियो र अदालतमा उपस्थित हुन भनिएको थियो, तर अभियोजन पक्षले उनीहरु फरार भएको र उनीहरुलाई अनुपस्थितिमा न्याय दिइने बताएको छ ।

देशको भ्रष्टाचार विरोधी आयोगका अधिकारीहरूको गवाहीका साथ ढाकाको विशेष न्यायाधीश अदालत–४ मा मुद्दा औपचारिक रूपमा बुधबार सुरु भयो । 

बुधबार दिउँसोसम्म अदालतले दुई अधिकारीको गवाही सुनेको र तेस्रोले भोलिपल्ट गवाही दिने अपेक्षा गरिएको सरकारी अभियोजक मुहम्मद तारिकुल इस्लामले बताए । 

सिद्दीकका वकिलहरूले पहिले आरोपहरू आधारहीन र राजनीतिबाट प्रेरित भएको बताएका थिए ।

छुट्टै, भ्रष्टाचार विरोधी अनुसन्धानले सिद्दीकको परिवारले बङ्गलादेशमा आणविक उर्जा संयन्त्रका लागि रुससँग सन् २०१३ को सम्झौतामा मध्यस्थता गरेको आरोप लगाएको छ ।

उक्त सम्झौतामा ठूलो रकमको दुरुपयोग भएको बताइएको छ ।

सिद्दिकले संसद्मा उत्तरी लन्डन जिल्ला ह्याम्पस्टेड र हाइगेटको प्रतिनिधित्व गर्नेछन् ।  

उनले बेलायतको मध्य–वामपन्थी लेबर पार्टी सरकारमा वित्तीय भ्रष्टाचारको सामना गर्न जिम्मेबार मन्त्री अर्थात सहरी मन्त्रीका रूपमा सेवा  गरे । 

गत वर्ष अगस्टमा विद्यार्थी नेतृत्वको जन विद्रोहमा १५ वर्षको शासनपछि हसिना अपदस्थ भएका थिए ।  उनी भारत भागेका थिए । र त्यसबेलादेखि निर्वासनमा छन् । 

नोबेल शान्ति पुरस्कार विजेता मुहम्मद युनुसले अन्तरिम नेताका रूपमा पदभार ग्रहण गरे र पूर्व प्रधानमन्त्रीमाथि मुद्दा चलाउने प्रतिज्ञा गरे । 

विद्रोहका क्रममा सयौँ प्रदर्शनकारीहरू मारिए र हसिनाले अहिले मानवता विरुद्धको अपराधसहितका आरोपहरूको सामना  गरिरहेका छन् ।