मस्को / करिब ५० जना यात्रु बोकेको एउटा यात्रु विमान बिहीबार रुसको सुदूर पूर्वी क्षेत्र अमुरको दुर्गम स्थानमा दुर्घटना भएको छ । अधिकारीहरूले दुर्घटनापछि तत्काल कुनै बाँचेकाको सङ्केत नदेखिएको बताएका छन् ।

अङ्गारा एयरलाइन्सले सञ्चालन गरेको यो दुई प्रोपेलर भएको एन्टोनोभ-२४ विमान ब्लागोभेश्चेन्स्क सहरबाट टिन्डा सहरतर्फ जाँदै गर्दा स्थानीय समयअनुसार दिउँसो १ः०० बजे (०४०० जिएमटी) राडारबाट हराएको थियो।

पछि एउटा उद्धार हेलिकप्टरले टिन्डाबाट लगभग १६ किलोमिटर (१० माइल) टाढाको जङ्गल भएको पहाडी ढलानमा जलिरहेको विमान देखेको थियो । रूसी अनुसन्धानकर्ताहरूले प्रकाशित गरेको भिडियोहरूमा घना, जङ्गली क्षेत्रमा विमानको भग्नावशेषबाट धुवाँको मुस्लो उडिरहेको देखिएको छ ।

हेलिकप्टरमा रहेका उद्धारकर्ताहरूले कुनै बाँचेकाको प्रमाण नदेखेको स्थानीय उद्धारकर्ताहरूले बताए । अमुर क्षेत्रको नागरिक सुरक्षा एजेन्सीले घटनास्थलमा स्थल टोली पठाउने बताएको छ ।

“हाल २५ जना र पाँच एकाइ उपकरणहरू पठाइएको छ, र चार विमान र तिनका चालक दलहरू तयारी अवस्थामा छन्”, एजेन्सीले भन्यो । जङ्गली भू-भागले घटनास्थलमा पुग्न कठिनाई भएको एक उद्धारकर्ताले राज्य समाचार एजेन्सी तासलाई बताए ।

“मुख्य खोजी कार्यहरू हवाईबाट सञ्चालन भइरहेका छन्”, उनीहरूले भने । रूसी सहर इर्कुत्स्कमा आधारित सानो क्षेत्रीय वाहक अङ्गारा एयरलाइन्सले तुरुन्त कुनै सार्वजनिक टिप्पणी गरेको छैन । विमानले ‘दोस्रो अवतरण’ को प्रयास गरेको थियो ।

उक्त क्षेत्रका गभर्नर भासिली ओर्लोभका अनुसार विमानमा ४३ जना यात्रु र छ जना चालक दलका सदस्य थिए । यात्रुमध्ये पाँच जना बालबालिका थिए । रूसको राज्य समाचार एजेन्सी तासले आपत्कालीन सेवाहरूलाई उद्धृत गर्दै विमानमा ४० यात्रु र छ चालक दल रहेको बताएको छ ।

टिन्डा विमानस्थलमा दोस्रो पटक पुग्ने प्रयास गर्दा विमान दुर्घटना भएको रुसको सुदूर पूर्वी यातायात अभियोजकको कार्यालयले जनाएको छ । “टिन्डा विमानस्थलमा पुग्दा विमानले दोस्रो अवतरणका लागि घुम्यो, त्यसपछि सम्पर्क टुटेको थियो”, अभियोजक कार्यालयले भन्यो, “परिस्थितिहरूको अनुसन्धान भइरहेको छ ।”

यसले दुर्घटनाको कारणबारे तत्काल कुनै टिप्पणी गरेको छैन । राज्य समाचार एजेन्सी तासले यो विमान झण्डै ५० वर्ष पहिले निर्माण गरिएको रिपोर्ट गरेको छ ।

“सन् २०२१ मा विमानको उडान योग्यता प्रमाणपत्र सन् २०३६ सम्म बढाइएको थियो”, उड्डयन सेवाका स्रोतलाई उद्धृत गर्दै यसले रिपोर्ट गरेको छ । एन्टोनोभ–२४ एक लोकप्रिय, सोभियत–डिजाइन गरिएको दुई प्रोपेलर विमान हो । यसले पहिलो पटक सन् १९५९ मा सेवा सुरु गरेको थियो ।

रूसले हालका वर्षहरूमा सोभियत विमानबाट आधुनिक जेटहरूमा स्विच गर्ने कदमहरू चालेको छ, तर पुराना हल्का विमानहरू अझै पनि दुर्गम क्षेत्रहरूमा व्यापक रूपमा प्रयोग हुन्छन् र दुर्घटनाहरू बारम्बार हुन्छन् ।