काठमाडौँ / साताको अन्तिम कारोबार दिन बिहीबार सेयर बजार परिसूचक नेप्से ९.०८ अङ्कले घटेको छ । बुधबार घटेको बजार बिहीबार पनि घट्दा नेप्से परिसूचक २६५५.८२ बिन्दुमा पुगेको छ । नेप्से परिसूचक घटेको बजारमा कारोबार रकम भने बढेको छ ।
आज बजारमा २४८ कम्पनीका ३११ वटा स्टकको २ करोड ८६ लाख कित्ता सेयर १२ अर्ब ५१ करोड ५३ लाख रुपैयाँको कारोबार भएको छ।
आज ठुला कम्पनीको कारोबार सूचक सेन्सेटिभ इन्डेक्स १.९९ अङ्कले घटेको छ भने फ्लट इन्डेक्स ०.५९ प्रतिशत र सेन्सेटिभ फ्ल्ट इन्डेक्स ०.७४ प्रशितले घटेको छ ।
आज कारोबारमा आएका कम्पनीहरूमध्ये ९९ वटाको मूल्य बढेको छ भने १४९ वटाको मूल्य घटेको छ। बजारमा आज १३ मध्ये चार समूह बढेको छ भने बाँकी सबै समूह घटेको छ ।
आज होटल तथा पर्यटन समूहको परिसूचक सबैभन्दा बढी २.१४ प्रतिशतले बृद्धि भएको छ । त्यस्तै, वित्त, हाइड्रोपावर र म्युचुअल फण्ड पनि सामान्य बढेको छ । यता, विकास बैङ्क र व्यापार समूह सबैभन्दा बढी १ प्रतिशतले घटेको छ भने अन्य समूहको सूचक पनि घटेको छ ।
बिहीबार प्योर इनर्जीको सेयर मूल्यमा ९.९९ प्रतिशतको बृद्धि देखिएको छ । त्यस्तै, चन्द्रागिरी हिल्सको सेयर मूल्य ६.७८ प्रतिशतले बढेको छ ।
आज गुराँस लघुवित्तले सबैभन्दा बढी गुमाएको छ । यो कम्पनी ९.९० प्रतिशत गिरावटसहित सबैभन्दा धेरै गुमाउने कम्पनी बनेको हो।
कारोबार रकमका आधारमा आज ङादी ग्रुप पावर कम्पनी १ अर्ब ८ करोड १८ लाख ८८ हजार रुपैयाँभन्दा बढीको कारोबार गरेको छ । दोस्रो स्थानमा रहेको सानिमामाई हाइड्रोपावरको ७५ करोड ३८ लाख ५४ हजार रुपैयाँको सेयर कारोबार भएको छ ।
