काठमाडौँ / नेपाल मौरीपालक महासंघले आयोजना गरेको छैठौँ राष्ट्रिय मह मेला-२०८२ काठमाडौँको भृकुटीमण्डपमा आज तेस्रो दिन अर्थात अन्तिम दिन पनि जारी छ । ‘आत्मनिर्भर मौरी व्यवसायी, सक्षम, सुदृढ महासंघ, नेपाली मौरीजन्य उपजको संसारभर पहिचान’ नाराका साथ बिहीबारबाट सुरु भएको मेलामा थरीथरीको मह र मौरी पालन गर्ने सामग्रीमा ग्राहकहरूको आकर्षण बढेको हो ।
महासंघले स्वेदशी मह उत्पादन खपत बढाउनका लागि महको फाइदाबारे प्रचार गर्न मह मेला हुन लागेको जनाएको छ । मेलाले मौरीपालक व्यवसायिक किसानहरूका लागि व्यवसायको प्रचार प्रसार र विस्तारका लागि सहयोग पुग्ने महासंघले जनाएको छ । हाल सरकारले मह आयातमा रोक लगाएको छ । यसबाट मह उत्पादन बढ्दै गएको छ भने नेपाली महको खपत पनि बढ्दै गएको छ ।
विगतमा भन्दा अहिले मन्त्रालयमार्फत सकारात्मक सहयोग प्राप्त भएको मौरी पालक किसान तथा मह उत्पादकहरू बताउँछन् । मेलामा प्रदेश, जिल्ला, पालिका अन्तगर्गतका उद्यमी तथा मौरी व्यवसायहरू सहभागी भएका छन् ।
भृकुटीमण्डपमा जारी मह मेलामा ४० वटा कक्षमा मह, घार, पोलन, प्रपोलिस, टोपी, ब्रसलगायत सामग्री राखिएको छ । मेलामा सातै प्रदेशका किसानको सहभागिता छ । त्यस अवसरमा महसम्बन्धी छलफलसमेत आयोजना गरिएको छ ।
मह मेलाका संयोजक सुवासचन्द्र घिमिरेका अनुसार मेलामा मौरीपालनका क्षेत्रमा प्रयोग हुने प्रविधि, मौरीका विभिन्न प्रजातिका बारेमा र महसम्बन्धी जानकारी दिइनेछ । उनका अनुसारका मौरीको प्रजातिअनुसार महको गुण, स्वाद र रङ फरक हुन्छ ।
आज (तीन दिन)सम्म चल्ने मह मेला बिहीबार कृषि तथा पशुपन्छी विकासमन्त्री रामनाथ अधिकारीले उद्घाटन गरेका हुन् ।
मेलाको उद्घाटन गर्दै मन्त्री अधिकारीले खुल्ला बजारमा सबैले प्रतिस्पर्धा गर्न पाउने भएकाले शुद्ध मह उत्पादनलाई पहिलो प्राथामिकता दिन जरुरी रहेको बताएका थिए ।
मह उत्पादकहरूलाई उत्पादनमा जोड दिन आग्रह गर्दै मन्त्री अधिकारीले बजारको समस्या हटाउन सरकारले पहले गर्ने विश्वास दिलाएका छन् । हाल नेपालमा वार्षिक पाँच हजार मेट्रिक टन भन्दा बढि मह उत्पादन हुँदै आएको छ । महासङ्घ आबद्ध किसानले यस वर्ष मात्रै २२६ टन मह उत्पादन गरेका छन् ।
नेपालमा सेरेना मौरीको गोला १२ हजार १३८ वटा छ भने मेलिफेराको छ हजार ५०० गोला छ । सेरेना पाल्ने किसान ७११ जना र मेलिफेरा मौरी पाल्ने किसान २७० जना महासङ्घमा आबद्ध छन् ।
