काठमाडौँ / नेपाल स्टक एक्सचेन्ज (नेप्से) परिसूचक २.७९ अङ्कले घटेर २६०९.०५ विन्दुमा कायम भएको छ। पछिल्लो छ कारोबार दिन आज पनि नेप्से परिसूचकमा गिरावट देखिएको हो।
आज ३०९ कम्पनीको एक करोड ६९ लाख सात हजार ७३७ कित्ता सेयर ७९ हजार ८९३ पटक खरिदबिक्री हुँदा ८ अर्ब ५० करोड ९२ लाख २१ हजार ३१२.६१ को कारोबार भएको छ।
आज सय कम्पनीको सेयर मूल्य बढ्दा एक सय ४५ कम्पनीको घटेको छ भने एउटा स्थिर अवस्थामा छ। ओम मेगाश्री फर्मास्युटिकल्स लिमिटेडको सेयर मूल्यमा सकारात्मक सर्किट लागेको छ।
त्यस्तै, छाब्दी हाइड्रोपावर लिमिटेड ९.९९, विन नेपाल लघुवित्तीय संस्था लिमिटड ९.५३, नेपाल पुनर्बिमा कम्पनी ८.४१, बाराही हाइड्रोपावर पब्लिक लिमिटेडको सेयर मूल्य ७.३२ प्रतिशतले बढेको छ।
आज सबैभन्दा बढी कर्पोरेट डेभपलमेन्ट बैँक लिमिटेडको सेयर मूल्य ८.७१ प्रतिशतले घटेको छ। साथै सबैभन्दा बढी नेपाल रिइन्स्योरेन्स कम्पनीको ७० करोड ३७ लाखको सेयर कारोबार भएको छ।
