काठमाडौँ / बैशाख २६ गतेदेखि ३० गतेसम्म राष्ट्रिय मह मेला २०८१ सञ्चालन हुने भएको छ । नेपाल मौरीपालक महासंघ भरतपुर, चितवन र नेपाल मौरीपालन केन्द्रीय सहकारी संघको आयोजनामा पाँच दिनसम्म मह मेला हुने भएको हो । स्वदेशी महको बजारीकरण तथा मह उत्पादक किसान, मह बिक्रेता र उपभोक्ताहरूबिचको सम्बन्ध प्रगाढ बनाउने उद्देश्यले उक्त मह मेलाको आयोजना गर्न लागिएको नेपाल मौरीपालक महासंघका अध्यक्ष सुभाषचन्द्र घिमिरेले जानकारी दिए ।
उक्त मेलालाई व्यवसायिक कीट विकास केन्द्र हरिहर भवन, मौरी विकास कार्यालय गोदावरी र मौरी विकास कार्यालय भण्डाराले आर्थिक सहयोग गरेको छ । सबै जिल्ला र प्रदेशका मह उत्पादक किसानहरूलाई मेलामा समेट्न चाहेको भए पनि बजेट अभावका कारण सम्भावना कम देखिएको अध्यक्ष घिमिरे बताउँछन् ।
उनले भने, “किसानहरू मह बिक्री नभएर समस्यामा छन् । यस्तो बेलामा किसानहरूले खर्च बेहोर्न सक्ने अवस्था पनि छैन । सरकारले मह मेलाका लागि दिने भनेको बजेट पनि कटौति भएको छ ।” बजेट अभावको बावजुद पनि मेलामा २५ देखि ३० ओटा स्टलसम्म रहने उनले जानकारी दिए ।
यअसघ महासंघले चितवनमा दुई पटक मह मेलाको आयोजना गरेको थियो भने मह व्यवसायी संघ र नेपाल मौरीपालन केन्द्रीय सहकारी संघको आयोजनामा काठमाडौँमा एक पटक मह मेलाको आयोजना गरिएको थियो ।
उनका अनुसार अहिले मेलिफेराको वार्षिक उत्पादन ३ हजार मेट्रिक टन र सेरानाको १ हजार मेट्रिक टनभन्दा बढी मह उत्पादन भइरहेको छ । यद्यपि, नेपाली किसानले उत्पादन गरेको मह ३ बर्षदेखि घर घरमै मौज्दात अवस्थामा रहेको उनले बताए । महले बजार नपाउँदा किसानहरू पेसाबाटै विस्थापित हुन बाध्य भएको उनको भनाइ छ ।
नेपाली किसानले उत्पादन गरेको मह किसानको घर घरमा रहनु बजारमा खपत हुने एक हजार मेट्रिक टन मह बाहिरबाट आपूर्ति हुँदा नेपाली अर्थतन्त्रमा समेत ह्रास आउने उत्पादकहरूले बताउँदै आएका छन् ।
