काठमाडौँ / खानीखोला हाइड्रोपावरले हकप्रद सेयर निष्कासन प्रयोजनका लागि असार २७ गते एक दिनका लागि बुक क्लोज मिति तय गरेको छ । कम्पनीले नेपाल धितोपत्र बोर्डबाट असार १० गते हकप्रदका लागि स्वीकृति प्राप्त गरेको थियो ।
कम्पनीले १ः१ अनुपातमा हकप्रद सेयर निष्कासन प्रयोजनका एक दिनका लागि बुक क्लोज गर्ने निर्णय गरेको हो । असार २६ गतेसम्म नेप्सेमा कारोबार भई कायम हुने सेयरधनीहरूले मात्रै कम्पनीद्वारा जारी गरिने हकप्रद खरिदका लागि आवेदन दिन पाउने छन् ।
कम्पनीले प्रतिसेयर १०० रुपैयाँ दरका ४६ करोड ५७ लाख १४ हजार रुपैयाँ बराबरको कुल ४६ लाख ५७ हजार १४३ कित्ता हकप्रद निष्कासन गर्ने भएको छ । हकप्रद निष्कासन तथा बिक्री प्रबन्धकको रूपमा सिटिजन्स क्यापिटल रहेको छ ।
