काठमाडौं/ यातायात व्यवसायीले राइड सेयरिङलाई सरकारले कानुनी मान्यता दिएको विरोधमा सोमबारदेखि अनिश्चितकालीन यातायात बन्द गरेपछि सर्वसाधरणको जीवन अस्तव्यत बनेको छ ।
नेपाल यातायात व्यवसायी राष्ट्रिय महासंघको अगुवाइमा भएको बन्दका कारण काठमाडौं उपत्यकासहित देशभर सार्वजनिक यातायात चलेका छैनन् । जसकारण सर्वसाधरणले सास्ती व्यहोर्नु परेको हो ।
यातायात व्यवसायीहरूको आकस्मिक बन्दका कारण बिरामी, काममा जाने कर्मचारी, विद्यार्थी र दैनिक मजदुरीमा निर्भर सर्वसाधारण समेत प्रभावित भएका छन् ।
काठमाडौंको बालाजुदेखि बबरमहलसम्म पैदल यात्रा गर्दै ववरमहल आइपुगेका पदमराज जोशीले यातायात बन्दले सर्वसाधारणहरुको विचल्ली भइरहेको दुःखेसो गरे । ‘२१ औँ शताब्दीमा भौतिक पूर्वाधार बन्द गर्नु राज्य र व्यवसायी दुवैको हो । दुइ तिहाइको सरकार भन्ने तर, यातायात व्यवसायीसँग झुक्ने ?,’ उनको प्रश्न थियो ।
जनतालाई साथ दिनुपर्ने अवस्थामा राइड सेयरिङ गर्नेहरुले चर्को भाडा अशुल्नु गलत रहेको भन्दै नीजि सवारी साधनमा यात्रु राख्ने कुरामा व्यवसायीले हस्तक्षेप गर्न नहुने बताए ।
बबरमहलदेखि भक्तपुर जान हिडेकी क्रिस्टिना मिश्रले सरकार र व्यवसायीका बिच कुरा नमिल्दा सधैं जनताले सास्ती खेपिरहेको बताइन् । उनले यातायात बन्दका कारण सधैंजसो दुईसय रुपैंयाँ तिरेर हिड्ने गरेको तर सोही दूरीमा यात्रा गर्दा हाल चारसय रुपैंयाँ तिर्न परेको दुखेसो पोखिन् ।
सार्वजनिक यातायातले पनि मनलाग्दी भाडा लिनुका साथै मान्छे धेरै कोचेर हिड्दा धेरै चोरी डकैती वा पकेटमारको समस्या हुने गरेको सुनाइन् ।
घट्टेकुलोदेखि रत्नपार्क जाँदै गरेका अर्का पैदल यात्रु चेतनाथ पौडेलले यातायात बन्दले सर्वसाधरण अर्थात गरिखाने वर्गलाई असर गरिरहेको बताए ।
उनले ‘यातायात बन्दले सर्वसाधरण अर्थात गरिखाने वर्गलाई नै असर गरिरहेको छ । अझै कतिदिन यस्तो बन्द चल्ने हो थाहा छैन् । राइड गर्नेहरुको पनि नियत ठिक हुनपर्छ ।
नियत ठिक छ भने जतिसुकै राइड भएपनि फरक पर्दैन् । नियत नै ठिक छैन भने जे गर्दा नि कठिन हुन्छ । सार्वजनिक यातायातले पनि समयमै पुग्नपर्ने स्थानमा पु¥याईदिए सजिलो हुनेछ ।’
शोभा भगवतीबाट बबरमहल आएकी जसता खतिवडाले बन्दले १५ मिनेटमा पुग्न सकिने ठाउँमा एक घन्टा पैदल हिडेर आउनु परेको दुखेसो गरिन् ।
‘यातायात बन्दले गाडीमा १५ मिनेटमा पुग्ने स्थानमा हिडेर एक घन्टा भन्दा बढी लाग्यो । राइड सेयरिङमा पनि पैसा धेरै लिन्छ । सर्वसाधारणलाई कष्ट पर्दा धेरै शुल्क उठाउनु राम्रो होइन । सार्वजनिक यातायातहरुले पनि मनलाग्दी गर्ने, धेरैबेर रोक्ने गरेका छन्,’ उनले दुखेसो सुनाउँदै भनिन् ।
यातायात बन्दका कारण हुनेखाने भन्दापनि गरिखाने वर्गले सास्ती व्यहोरिरहेको पैदल यात्रु रश्मी रिजालको गुनासो छ । सरकारी जागिर हुनेहरुलाइई बन्द भएपनि सहज भएको तर नीजि कम्पनीमा जागिर खानेहरुलाई गा¥हो भइरहेको बताइन् ।
बन्दको मौकामा राइड सेयरिङवालाहरुले चर्को शूल्क असुल्ने गरेको भएपनि पैसा हुनेहरु चढेर हुइँरहेको बताउँदै गरिखाने वर्गहरु समस्या परेको बताइन् ।
काठमाडौंकै गोलढुंगादेखि बबरमहल आएका रनपान पाण्डेले बन्दले गर्दा सबैखाले वर्गले दुःख पाएको बताए । छोटो दुरीमा पैदल यात्रा गर्न सकेपनि लामो दूरीको यात्रा गर्न कठिन हुने गरेको बताए । उनले पशुपति शर्माको गीतलाई सम्झदै देशलाई जनता र नेताले नै लुटिरहेको गुनासो गरे ।
‘बन्दले गर्दा छोटो दुरीमा त हिड्न त सकिन्छ तर लामो दूरीको यात्रामा सर्वसाधरणले दुःख पाइरहेका छन् । नेपालमा पठाओवालाहरुले पनि पशुपति शर्माको गीतले भनेजस्तै लुट्न सके लुट कान्छा जस्तै गरिरहेका छन् ।’
