काठमाडौँ / अख्तियार दुरुपयोग अनुसन्धान आयोगले नेपाली कांग्रेसका नेता तथा पूर्व सूचना तथा सञ्चारमन्त्री मोहन बस्नेतविरुद्ध विशेष अदालतमा भ्रष्टाचार मुद्दा दायर गरेको छ।
‘टेराम्याक्स’ घोटालामा संलग्न रहेको आरोपसहित बस्नेतविरुद्ध बिहीबार विशेष अदालत काठमाडौंमा मुद्दा दर्ता गरिएको आयोगका प्रवक्ता राजेन्द्रकुमार पौडेलले जानकारी दिए।
पूर्वमन्त्री बस्नेतसहित दूरसञ्चार प्राधिकरणका तत्कालीन अध्यक्ष दिगम्बर झा र अन्य १६ जनालाई प्रतिवादी बनाई मुद्दा चलाइएको हो। आयोगले उनीहरूबाट कुल तीन अर्ब २१ करोड ८३ लाख ७७ हजार १८२ रुपैयाँ बराबरको बिगो असुल गर्नुपर्ने माग गर्दै मुद्दा दायर गरेको हो।
अख्तियारका अनुसार भ्रष्टाचार निवारण ऐन, २०५९ को दफा १७ अन्तर्गत भ्रष्टाचारको कसूरमा अभियोजन गरिएको छ। आरोप प्रमाणित भएमा कानुनअनुसार ८ वर्षदेखि १० वर्षसम्म कैद सजाय र बिगोबापत जरिवाना हुने व्यवस्था छ।
