काठमाडौँ/ धनुषाको बटेश्वर गाउँपालिकाका तत्कालीन प्रमुख प्रशासकीय अधिकृत सावन कुमार चौधरीसहित तीन जनाविरुद्ध भ्रष्टाचार मुद्दा दायर भएको छ।
अख्तियार दुरुपयोग अनुसन्धान आयोगका प्रवक्ता राजेन्द्र कुमार पौडेलका अनुसार आर्थिक वर्ष २०७६/ ७७ मा विभिन्न वडामा स्वास्थ्य केन्द्र निर्माण, डिप बोरिङ र डिप बोरिङ हाउस निर्माणको ठेक्का सम्बन्धमा सो भ्रष्टाचार मुद्दा दायर भएको हो।
उनका अनुसार सो ठेक्का आह्वानको सूचना र बोलपत्र स्वीकृतको सूचना सार्वजनिक खरिद ऐन बमोजिम राष्ट्रिय स्तरको दैनिक पत्रिकामा प्रकाशन गर्नुपर्नेमा जनकपुर टुडे राष्ट्रिय दैनिकका प्रधान सम्पादक एवम् जनकपुर टुडे मिडिया ग्रुपका अध्यक्ष वृजकुमार यादव र छैठौं तहका अधिकृत सुमन कुमार पुरीसँगको मिलेमतोमा लुकाइ छिपाइ, सार्वजनिक रुपमा सूचना प्रकाशन नगरी बटेश्वर गाउँपालिकाको ठेक्का कार्यालयमा अभिलेख राख्ने प्रयोजनका लागि सो सूचना प्रकाशन गरी छ लाख ४४ हजार एक सय रुपियाँ जनकपुर टुडे मिडिया ग्रुप प्रा।लि।लाई भुक्तानी दिइएको पुष्टि भएको छ।
भ्रष्टाचार निवारण ऐन, २०५९ को दफा ८ को उपदफा (१) को देहाय (ङ) बमोजिमको कसुरमा बिगो रकम छ लाख ४४ हजार एक सय रुपियाँ कायम गरी कैद र जरिवाना सजाय हुन मागदाबी लिइ मङ्गलबार विशेष अदालत, काठमाडौंमा आरोपपत्र दायर भएको आयोगले जनाएको छ।
