काठमाडौं/ नक्कली शैक्षिक प्रमाणपत्र पेश गरी नियुक्ति सरकारी लिएको अभियोगमा दिपेन्द्र कुमार झा भनिने दिपेन्द्र कुमारविरुद्ध अख्तियार दुरुपयोग आयोगको फन्दामा परेका छन् । आयोगले आज विशेष अदालत काठमाडौंमा आरोपपत्र सकित मुद्दा दायर गरेको हो ।
उनी सप्तरीको तिलाठी कोईलाडी गाउँपालिकामा सव– इन्जिनियर (प्राविधिक सहायक) पदमा कार्यरत थिए ।
अख्तियार दुरुपयोग अनुसन्धान आयोगका अनुसार झाले सव–इन्जिनियर पदमा करार नियुक्ति लिने प्रयोजनका लागि त्रिभुवन विश्वविद्यालय, इन्जिनियरिङ संस्थान, पश्चिमाञ्चल क्याम्पस, पोखराबाट डिप्लोमा इन सिभिल इन्जिनियरिङ पास गरेको भनी नक्कली एकेडेमिक ट्रान्सक्रिप्ट र क्यारेक्टर सर्टिफिकेट पेश गरेका थिए।
अनुसन्धानको क्रममा ती प्रमाणपत्रहरू नक्कली भएको पुष्टि भएको छ ।
आयोगले झाविरुद्ध भ्रष्टाचार निवारण ऐन, २०५९ को दफा १६ (१) बमोजिम कैद र जरिवाना सजाय मागदाबी गर्दै आरोपपत्र दर्ता गरेको हो।
विशेष अदालत काठमाडौंमा आज दायर गरिएको उक्त आरोपपत्रमा झाले ओहोदा, लाभ र सुविधा प्राप्त गर्न नक्कली प्रमाणपत्रको प्रयोग गरेको सहायक प्रवक्ता देवी प्रसाद थपलियाले बताएका छन् ।
