खोटाङ / यहाँको हलेसी तुवाचुङ नगरपालिकाले महिला, अपाङ्गता भएका र वैदेशिक रोजगारीबाट फर्किएकालाई बङ्गुरको पाठापाठी उपलब्ध गराएको छ ।
उनीहरूको आम्दानीको स्रोत वृद्धि गराउँदै नगरपालिकालाई मासुमा आत्मनिर्भर बनाउने उद्देश्यले उन्नत जातका बङ्गुरको पाठापाठी उपलब्ध गराएको नगरपालिकाले जनाएको छ।
नगरपालिकाले पारित गरेको ‘बङ्गुर प्रवर्धन कार्यक्रम’ अन्तर्गत यस वर्ष ११५ वटा उन्नत जातका बङ्गुरको पाठापाठी वितरण गरिएको नगर प्रवक्ता कमल गिरीले जानकारी दिए ।
“नगरवासीलाई बङ्गुरपालन व्यवसाय गराउन १६ घरपरिवारलाई खोर निर्माण गर्न ६० प्रतिशत अनुदान उपलब्ध गराएका छौँ । दुई लाख बराबरको खोर बनाएका घरपरिवारलाई नगरपालिकाका तर्फबाट एक लाख २० हजार अनुदान दिइएको छ”, उनले भने, “अनुदानमा खोर बनाएका घरपरिवारलाई दुई वटाको दरले बङ्गुरको पाठापाठी उपलब्ध गराएका छौँ । पशु प्राविधिकमार्फत परामर्श तथा औषधी उपचारसमेत उपलब्ध गराउने गरिएको छ ।”
नगरपालिकाबाट गठित छनोट समितिको सिफारिसमा ६८ घरपरिवारलाई एक, एक वटा बङ्गुरको पाठा उपलब्ध गराइएको नगर प्रवक्ता गिरीले जानकारी दिए ।
करुणा फाउनडेसनको सहयोगमा १५ वटा उन्नत जातका बङ्गुरको पाठापाठी अपाङ्गता भएका घरपरिवारलाई उपलब्ध गराइएको हो ।
नगर सभाबाट १२ लाख ५० हजार बजेट विनियोजन गरी बङ्गुर प्रवर्धन कार्यक्रम सञ्चालन गर्न आवेदन आह्वान गरेको थियो । नगरपालिकाले कृषि, पशु तथा उद्यम गर्न चाहनेलाई अनुदान उपलब्ध गराउँदै आएको छ । नगरपालिकाले यसअघि उन्नत जातका १०० वटा भैँसी वितरण गरिसकेको छ ।
सुक्खाग्रस्त क्षेत्रमा पर्ने यस नगरपालिकाले नगरवासीलाई दुध, मासु र तरकारीमा आत्मनिर्भर बनाउन आर्थिक वर्ष २०८०, ८१ को नगर सभाबाट नीति तथा कार्यक्रम पारित गरेको थियो ।
विशेषगरी वैदेशिक रोजगारीमा जाने युवालाई आफ्नै ठाउँमा रोजगार बनाउन व्यावसायिक कृषि तथा पशुपालनमा अनुदान दिने व्यवस्था गरेको नगर प्रमुख विमला राईले बताए । उनले भने, “हाम्रो नगरपालिकालाई दुध, मासु र तरकारीमा आत्मनिर्भर बनाउने योजना छ ।”
