काठमाडौँको मखन टोलमा आगलागी भएको छ । आज बिहान ६ ः ५० बजे काठमाडौँ महानगरको वडा नम्बर २४ स्थित मखन टोल महादेव चोकमा रहेको एक घरमा आगलागी भएको हो ।
दयाराम श्रेष्ठको घरको तेस्रो तल्लामा ग्यास लिक भएर आगलागी हुँदा छेउमै रहेको रुकेश श्रेष्ठको पाँच तले घरमा पनि आगलागी भएको हो । आगलागीमा परेर सो घरको चौथो तलामा बस्ने एक जना महिलाको मृत्यु भएको छ ।
मखन क्षेत्रमा नाङ्लोमा सामान बेच्दै आएकी करिब ६५ वर्षीया महिलाको मृत्यु भएको जिल्ला प्रहरी परिसर काठमाडौँका एसपी अपिल बोहराले जानकारी दिए ।
दोलखाको चरिकोटकी स्थानीय भएका कारण उनलाई स्थानीयले ‘चरिकोटे बुढी’ भनेर चिन्थे । आगलागी सुरु भएपछि निसास्सिएर उनको मृत्यु भएको अनुमान गरिएको छ । ६ वटा दमकलको सहयोगमा प्रहरी, सशस्त्र र सेनाले बिहान ८ बजेर ५३ मिनेटमा आगो नियन्त्रणमा लिएका छन् ।
उनले भने, “बिहान ६ ः ५० बजे काठमाडौँ महानगरको वडा नम्बर २४ स्थित मखन टोल महादेव चोकमा रहेको दयाराम श्रेष्ठको घरको तेस्रो तल्लामा ग्यास लिक भएर आगलागी भएको हो । त्यो आगो पछि छेउमै रहेको रुकेश श्रेष्ठको पाँच तले घरमा पनि आगलागी भयो ।”
