काठमाडौँ / विन नेपाल लघुवित्तको एफपिओ आइतबार बिहान बाँडफाट भएको छ । बिक्री प्रबन्धक एसबीआई मर्चेन्ट बैंकिङको कार्यालयमा आज बिहान कम्पनीको एफपिओ बाँडफाँट भएको हो । 

लघुवित्तले गत चैत २१ गतेदेखि २६ गतेसम्म प्रतिसेयर १०० रुपैयाँ अंकित मूल्यका ५१ लाख २९ हजार २५० रुपयाँ बराबरको ५१ हजार २९२.५० कित्ता एफपिओ बिक्री तथा निष्काशन गरेको थियो ।  एफपिओमा कुल १९ लाख २३ हजार ४९० जनाको आवेदन परेको थियो। 

जसमध्ये रितपूर्वक आवेदन दिएका १९ लाख २० हजार ९ सय ३९ जनालाई बाँडफाँटमा सहभागी गराइएको थियो । २ हजार ५२३ आवेदन रद्द भएको थियो । मागभन्दा बढी आवेदन परेका कारण गोलाप्रथा प्रक्रिया मार्फत लघुवित्तको एफपिओ बाँडफाँट गरिएको छ। 

उक्त बाँडफाँटमा ५ हजार १ सय २९ जनाले मात्र सेयर पाएका छन् । बाँडफाँट गर्दा शेष रहेको २.५० कित्ता सेयर सोही ५ हजार १२९ आवेदकमध्ये तीन जनालाई बाँडफाँट गरिएको छ। 

जसअनुसार २ जना आवेदकले ११ कित्ताका दरले शेयर प्राप्त गरेका छन् भने एक जनाले १०.५० कित्ता प्राप्त गरेका छन्। बिक्री प्रबन्धकका अनुसार उक्त निष्काशनमा कुल १९ लाख २३ हजार ४९० आवेदन मार्फत २ करोड २१ लाख ७६ हजार ८४० कित्ता माग भएको थियो। 

लगानीकर्ताले बिक्री प्रबन्धकको वेबसाइट र मेरो सेयर एकाउन्टबाट एफपिओको नतिजा हेर्न सक्नेछन्। साथै, कम्पनीको वेबसाइट तथा सिडिएस एन्ड क्लियरिङको वेबसाइट  https://iporesult.cdsc.com.np/ बाट पनि नतिजा हेर्न सकिन्छ।