काठमाडौँ / विन नेपाल लघुवित्त वित्तीय संस्था लिमिटेडको एफपिओमा आजदेखि आवेदन दिन सकिने भएको छ । कम्पनीले आज बिहीबारदेखि थप सार्वजनिक निष्कासन अर्थात एफपिओ निष्कासन तथा बिक्री खुला गरेको हो ।
लघुवित्तले ५१ लाख २९ हजार २५० रुपैयाँ बराबरको प्रतिकित्ता १०० रुपैयाँ अंकित मूल्यका ५१ हजार २९२.५ कित्ता सेयर निष्कासन गरेको हो ।
कम्पनीको एफपिओमा लगानीकर्ताहरूले चैत २६ गतेसम्म आवेदन दिन सक्नेछन्। उक्त अवधिभित्र पर्याप्त आवेदन नपरेमा ढिलो निष्कासन अवधि २०८२ बैशाख ४ गतेसम्म आवेदन दिन सकिनेछ। लघुवित्तको एफपिओमा न्यूनतम १० कित्ता र अधिकतम १ हजार कित्तासम्मका लागि आवेदन दिन सकिनेछ।
कम्पनीले एफपिओले क्रेडिट रेटिङ्ग कम्पनी केयर रेटिङ्ग नेपालबाट केयर एनपी सिंगल बी इस्यूअर रेटिङ्ग प्राप्त गरेको छ । यसले लघुवित्तको वित्तीय दायित्व बहन गर्ने क्षमतामा उच्च जोखिम रहेको सङ्केत गर्दछ।
लघुवित्तले बैंक तथा वित्तीय संस्था सम्बन्धि ऐन २०७३ को दफा ९ बमोजिम स्वः पूँजी संरचनामा सर्वसाधारणको हिस्सा ३० प्रतिशत कायम गर्न सर्वसाधारणमा एफपिओ निष्कासन गरेको हो ।
लघुवित्तको धितोपत्र निष्कासन तथा बिक्री प्रबन्धक नेपाल एसबिआई मर्चेण्ट बैंकिङ्ग लिमिटेड रहेको छ।
कम्पनीको एफपिओमा लगानीकर्ताले नेपाल धितोपत्र बोर्डबाट स्वीकृति प्राप्त गरेका सम्पूर्ण सि–आस्बा सदस्य बैंक तथा वित्तीय संस्थाहरु र तिनका शाखा तथा सिडिएस एण्ड क्लियरिङ्ग लिमिटेडको सफ्टवेयर ‘मेरो सेयर’ अनलाइनबाट सि–आस्बा प्रणालीमार्फत आवेदन दिन सकिनेछ ।
हाल लघुवित्तको चुक्ता पूँजी ७ करोड ९२ लाख ११ हजार ३०० रुपैयाँ रहेको छ। एफपिओ निष्कासनपश्चात लघुवित्तको चुक्तापूँजी ८ करोड ४३ लाख ४० हजार ५५० रुपैयाँ पुग्नेछ।
